donation picto
En Don maachen
2024
Fuerschung

Projet Pancor (Bauchspeicheldrüsekriibs)

Beschreiwung

Beim Projet Pancor geet et drëm, fir aus Echantillone vu Patienten Organoide vum Bauchspeicheldrüsekriibs  ze entwéckele fir de personaliséierte Funktiounsprofilage vu Medikamenter. Bauchspeicheldrüsekriibs, a besonnesch den duktalen Adenokarzinom (PDAC) ass eng aggressiv Erkrankung, bei där den Iwwerliewenstaux op 5 Joer manner wéi 5% ass. De Projet benotzt 3D-Zellkulturen, notamment PDAC-Organoiden, fir déi klinesch Reaktiounen op Medikamenter besser kënne virauszesoen. Dëse Projet stäipt sech op eng Plattform fir de Funktiounsprofilage vu Medikamenter (PFP), déi schonn a klinesche Pilotversucher fir metastaséierende Kolorektalkriibs getest gouf. De But ass et, dës Approche op de PDAC auszewäiten, och unhand vu Biopsien, déi duerch endoskopeschen Ultraschall (FNA/B) gesteiert ginn.

Méiwäert

Déi wichtegst Plus-value vun dem Projet ass d’Verwendung vu PDAC-Organoiden als Hëllefsmëttel fir den Traitement vun de Patiente jee no hire spezifesche Charakteristiken ze personaliséieren. Duerch d’Verwendung vun 3D-Kulture kann dat natierlecht Ëmfeld vun den Tumeurzelle besser reproduzéiert ginn, wouduerch d’Genauegkeet vun de Viraussoen iwwert d’Uspriechen op den Traitement am Verglach zu klasseschen 2D-Zellkulture verbessert gëtt.  Zil vun dësem Projet ass et, d’Behandlungssoptioune fir PDAC-Patiente méi zougänglech ze maachen a besser unzepassen, souguer an deene Fäll wou chirurgesch Biopsien net méiglech sinn, andeems méi kleng Echantillone geholl ginn, wéi Feinnadelbiopsien (FNA/B).

Status

De Projet ass am Ament an der Entwécklungsphas mat enger aktiver Collaboratioun tëschent dem Referenzspidol zu Lëtzebuerg (HRS) an dem Luxembourg Institute of Health (LIH). E klinesche Pilotversuch ass schonn erfollegräich bei metastaséierendem Kolorektalkriibs duerchgefouert ginn. De Projet ass elo prett fir e klinesche Versuch ze starte fir d’Implementéiere vum PFP fir PDAC-Patienten zu Lëtzebuerg ze evaluéieren, woubäi souwuel chirurgesch Echantillone wéi och FNA/B-Biopsië verwennt ginn. Eng zousätzlech Finanzéierung vun 100 000 € ass néideg, fir déi operationell Käschte vum Projet ze decken.

Wëllt Dir eng Spende maachen?

100
K € si néideg, fir d'Betribskäschte vum Projet ze decken.
50
Patienten solle bannent de nächste dräi Joer an d'Studie opgeholl ginn.
Dr Maike Aurich
Coordinatrice vun der Académie Médicale
"D’klinesch Fuerschung ass essentiel fir d’Innovatioun an der Medezin, well si hëlleft, Krankheete wéi de Bauchspeicheldrüsekriibs ze verstoen, ze behandelen a virzebeugen. D’Participante bei dëse Studie profitéiere vläicht net selwer vun hirer Participatioun, mee hir Contributioun kéint dozou bäidroen, fir nei Kenntnisser iwwert de Bauchspeicheldrüsekriibs ze gewannen an d’Behandlung an Zukunft ze verbesseren."
Dr Marc Berna
Generaldirekter vun den Hôpitaux Robert Schuman
"De Bauchspeicheldrüsekriibs ass relativ seelen, mee et ass dee Kriibs, deen am véiertheefegsten déidlech ass hei zu Lëtzebuerg. Ausserdeem gouf et an deene leschte Joerzéngte kee gréissere Fortschrëtt bei der Behandlung vum Bauchspeicheldrüsekriibs. Eist Zil ass et, eng systeemesch Behandlung ze schafen, déi fir all Patient personaliséiert ass."
Marie Berbon
Patientepartnerin
"Wat bei dësem Projet besonnesch ass, dat ass dass eng nei Roll an d’Fuerschung opgeholl gëtt, nämlech déi vum Patientepartner. E gëtt d’Méiglechkeet, eng eenzegaarteg a complementaire Perspektiv anzebréngen : déi vun der Patientenerfarung. De Fuerschungsprojet berücksichtegt d’Realitéit vun de Patiente fir d’Relevanz vun de Froen, déi gestallt ginn ze verbesseren an d’Stëmm vun de Patienten an deene verschiddenen entscheedenden Etappen ze berücksichtegen. Ech sinn iwwerzeegt, dass dëse Partenariat d’Fuerschung méi mënschlech, méi inklusiv a méi effizient mécht."
Dr Felix Kleine-Borgmann
Dokter an der Facharztausbidlung, Co-PI
"En tant que Medezinnen an den Hôpitaux Robert Schuman hunn mir d'Privileg, mat de Patienten an eise Fuerschungspartneren vum LIH ze schaffen, fir besser Krankheete wéi Bauchspaicheldrüsekriibs ze verstoen an ze behandelen. Am Kader vun dësem Projet zielen mir dorop of, personaliséiert Behandlungsoptiounen fir Kriibspatienten ze entwéckelen an dës direkt vum Laboratoire bei d'Bett vum Patient ze bréngen."
Dr Yong-Jun Kwon
Head of Precision Medicine Technology, Precision Medicine Technology; LIH
"Mir dreiwen de personaliséierte Funktiounsprofilage weider fir Behandlungen op Mooss fir de Bauchspeicheldrüsekriibs ze entwéckelen, déi den eenzegaartege Besoine vun all eenzele Patient entspriechen. Är Ënnerstëtzung wäert eis dobäi hëllefen, prezis Solutiounen unzebidden, déi Liewe retten an deenen, déi géint dës schrecklech Krankheet kämpfen nei Hoffnung ginn."
Dr Victoria El Khoury
Project Leader, Precision Medicine Technology
"All Patient ass eenzegaarteg an all Tumeur ënnerscheet sech vun där anerer. Mir huelen d’Kriibszelle vum Patient fir d’Eegenschafte vu senger Tumeur beschtméiglechst nozebilden, fir dass mir erausfanne kënnen, wéi ee Medikament a sengem Fall am effikasste wär."

Dës Projete kennen Iech interesséieren

All d'Projeten uweisen
All d'Projeten uweisen